LAOAG CITY – Naiget a kinondenar ti Department of National Defense (DND) ti baro nga insidente pakairamanan ti Chinese Coast Guard (CCG) kontra iti Philippine Navy personnel a naka-assign iti BRP Sierra Madre iti Ayungin Shoal.
Daytoy ket kalpasan a nasugatan ti ulo ti maysa a miembro ti Philippine Navy gapu ta minalo ti baton daytoy ti maysa a Chinese Coast Guard idiay Ayungin Shoal iti West Philippine Sea (WPS) ken nagsagaba ti pannakadadael ti rubber boats ti Navy.
Insigida a nagresponde ti Western Command (WESCOM) iti nasugatan a personnel.
Inbatad ti Armed Forces of the Philippines nga inaramidda laeng ti umno no sadinno sinurotda ti Rules of Engagement.
Kunana ti Department of National Defense (DND) a ti baro nga acts of violence ken harassment ket nayon iti “deficit of trust and credibility” ti People’s Republic of China.
Kabayatanna, agpanpanawagan ti Armed Forces of the Philippines iti People’s Liberation Army (PLA), Chinese Coast Guard ken Chinese maritime militia nga isardengen ti iligal ken agresibo nga addangda iti West Philippine Sea ken karbengan a suroten ti nakaikabil iti 2016 Arbitral Award a mangipaneknek ti maritime rights ti pagilian iti babaen ti international law.
