LAOAG CITY – Naarestaren dagiti dua a suspek a nagpapatay iti vlogger a ni Alicia “Mima Alicia” Lipata.
Kinumpiramaran ni Pcol. Allen Rae Co, hepe ti Public Information Office (PIO) ti Philippine National Police (PNP), a naarestaren dagiti suspek itay bigat Hulio 23 iti Mabalacat, Pampanga.
Dagiti suspek a nangpaltog iti biktima ket maysa a lalaki, agtawen 58 ken residente iti siudad ti Caloocan ken idinto a ti drayber ti motorsiklo ket maysa a lalaki, agtawen ti 48 ken residente ti Cavite.
Nakumpiskar manipud kadagiti suspek ti dua a hand grenades, maysa a caliber .45 ken maysa a .9mm a pistol no sadinno ket segun iti kameng ti Philippine National Police (PNP) ket ti .45 a paltog ti inaramat dagiti suspek iti insidente
Malaksid iti daytoy, kinumpirmaran pay ni Co a ti gunman ket adda ti sabali a sangsangoenna a kaso.
Maipalagip a sinnerek dagiti suspek ti balay ti biktima iti siudad ti Caloocan idi Hulio 17.
