LAOAG CITY – Guilty ti nagbalin a desision ti Sandiganbayan ken ni Janet Napoles para iti 10 a bilang ti graft ken 10 a bilang ti malversation of public funds through falsification of documents.
Gapu iti daytoy, pinatawan daytoy ti anti-graft court ti agingga 15 a tawen a pannakabalud iti kada kaso a graft ken 17 a tawen ken 4 a bulan agingga 20 a tawen iti kada kaso a malversation.
Ti nasao a reklamo ket adda pakainaiganna iti maipagarup naanomalya a panagkiddaw ti P50 million kadagiti 10 a non-government organizations (NGOs) babaen iti 10 a local government units (LGUs), manipud iti Department of Agrarian Reform (DAR) para iti farm inputs.
Basar iti imbestigasion, naduktalan a dagiti local government units (LGUs) ket awan naiprisintarda a rekord kadagiti nasao a proyekto ken naamoan a saanda a nagkiddaw ti pondo.
Malaksid ken ni Napoles, guilty pay ti nagbalin a desision ti Sandigan Bayan ken ni dati a Department of Agrarian Reform (DAR) Undersecretary Jerry Pacturan iti 10 a bilang ti malversation case-na.
Kabayatanna, karaman pay a napatawan ni Eveleyn de Leon ti sag-3 a bilang ti graft ken malversation.
