LAOAG CITY – Inbatad ni Senador Panfilo “Ping” Lacson a naestablisar nan iti imbestigasyon na ti saan a nababbaba ngem tallo maipagarop a “bagman” nga adda ti pakainaigan na kadagiti proyekto a pang-imprastraktura iti Taguig City.
Nupay kasta, saanna nga innaganan dagitoy wenno inlawlawag ti nagbalin a papel da.
Segun ken ni Lacson, adda ti sumagmamano nga indibidual a boluntaryo nga immasideg iti kampo na tapno mangipaay ti impormasyon kalpasan a nagsarita maipanggep iti maipagarop a maanomalya a proyekto iti Taguig.
Kuna na nga agtultuloy ti panangadal na kadagiti maaw-awat na nga impormasyon.
Inadmitir met ni Lacson nga ad-adda nga iprayoridad ti imbestigasyon na iti Taguig gapu iti saanda a panagkinnaawatan ken ni Senate Minority Leader Alan Peter Cayetano, ngem inpetteng na a saanna a punpuntiryaen ti ciudad.
Im-imbestigaren ti grupo ni Lacson ti maipagarop a ghost projects, agpapada a proyekto, ken dua a ₱100 milyon nga appropriations a maipagarop nga agpada ti lokasyon ken panangiladawan.
Immunan nga inpetteng ni Cayetano nga awan ti ghost projects iti Taguig ken kinarit na ni Lacson a mangipakita ti ebidensya.
Inrakurak ni Lacson a panpanunuten na ti direkta a panangisumitir na kadagiti naukkon na nga ebidensya iti Office of the Ombudsman imbes nga ikabil paylaeng nga umuna daytoy iti Senate Blue Ribbon Committee tapno mapaalisto ti imbestigasyon.
