LAOAG CITY – Nasugatan ti saan a bumaba iti 21 nga indibidual pakairamanan ti 19 a bumbero kalpasan ti dakkel nga uram idiay Queens, New York City.
Basar iti New York Fire Department (FDNY), naitaray kadagiti ospital dagiti nasugatan a bumbero para iti naan-anay a pannakataming dagitoy.
Awan kadagiti biktima ti nagsagaba ti deadly injuries ngem lima kadagiti bumbero ti nagsagaba ti sugat idinto a maysa kadakuada ti nagtalinaed iti ospital ken adda iti kritikal a kasasaad.
Nangrugi ti uram agarup alas-10 ti bigat iti maysa a pagtaengan iti College Point Boulevard iti Flushing ken alisto a nagramram ti apoy kadagiti kaabayna a pasdek.
Makita ti napuskol nga asok a nangbalkot kadagiti kabalbalayan kabayatan ti panangiwayat ti operasion dagiti nagresponde a bumbero tapno makontrol ti apoy.
Naammoan nga adda ti sumagmamano a residente ti kinasapulan nga isalakan manipud iti nasao a pagtaengan a namunganayan ti uram.
Agtultuloy nga im-imbestigaran dagiti otoridad ti namunganayan ti insidente ken inpasiguradoda ti kinatalged dagiti residente kadagiti naapektaran a lugar.
