LAOAG CITY – Naruay ti nakirambak iti maysa a music entertainment hall idiay Estancia, Pasig City no sadinno nga adu ti nakilig idi nakitada ni Daniel Padilla a nakagiddanda a nagbuya ken nag-enjoy iti lugar.
Nagatendar ni Daniel iti album launching ti paboritona a banda nga Hilera.
Naiget ti nagbalin a suporta ni Deej iti banda a kanayonna a kadua iti out-of-town shows ken corporate events nga isuda ti banda agpatpatukar no adda ti gig ti aktor.
Malaksid iti nasao a banda, guest met iti nasao a show ti RadRed band ti naub-ubing a kabsat ni DJ a ni JC Padilla.
Daydayawen dagiti miembro ti dadduma pay a banda ni Daniel a nag-perform iti nasao nga event kas ti Autotelic, Mayonnaise ken Zelle.
Daytoy ket kalpasan nga immasideg ti aktor kadagiti artist ken kinablaawanna isuda kagiddan ti panangipannakkelna a nalalaing dagitoy.
Nagbalin met a proud dagiti nasao nga OPM artist kadagiti panangdayaw ni Deej kadakuada.
