LAOAG CITY – Inkari ni Philippine National Police (PNP) chief General Jose Melencio Nartatez Jr. a ipatungpal ti pulisia ti maximum tolerance ngem nagapelar ti kooperasuon kadagiti raliyista kagiddan ti maisayangkat a maikalima nga State of the Nation (SONA) ni Presidente Ferdinanfg “Bongbong” Marcos Jr. ita nga aldaw, Hulio 27.
Agpanpanawagan pay ti Philippine National Police (PNP) chief a dayawen ti karbengan ti tunggal maysa ken imentenar ti kinakappia ken kinaurnos ita nga aldaw.
Daytoy ket iti baet ti manamnama a dakkel a tignay protesta manipud iti multi-sectoral groups a naipaayan ti permit tapno makaisayangkat ti rally iti naikeddeng a sites kas diay Commonwealth Avenue nga asideg iti Batasang Complex diay Quezon City no sadinno isayangkat ti State of the Nation (SONA) ti Presidente.
Pakairamnan dagiti nakaala ti rally permits ket ti Bagong Alyandang Makabayan (BAYAN) ken Sanlakas and Better Brighter.
Mainaig iti daytoy, immunan a nangiwaras ti sumrok 20,000 a pulis tapno bantayan dagiti kangrunaan a lugar sakbay iti naikeddeng nga SONA iti oras ti alas-4 ti malem.
Immuna pay nga inbatad ti Philippine National Police (PNP) nga ipatungpalda dagiti amin a nakappia a wagas tapno malappedan dagiti raliyista gapu iti panagpuorda ti effigies iti kangitingitan dagiti tignay protesta.
