LAOAG CITY – Natay ti tallo nga indibidual ken sumagmamano a sabsabali dagiti nasugatan kalpasan ti pammaltog a napasamak iti food festival iti asideg ti Space Needle iti Seattle.
Segun kadagiti otoridad, naarestar dan ti maysa kadagiti suspek iti pammaltog idinto a ti maysa ket agtultuloy ti panangan-anop da.
Iti baet ti napasamak a pammaltog, inpasigurado dagiti otoridad nga awan ti pangta iti seguridad ti publiko kalpasan ti insidente.
Naamoan a kabayatan a makumikum dagiti naruay a tattao iti maibilang a maysa a kalatakan a tourist spot ti ciudad kas selebrasyon ti tinawen a Bite of Seattle food festival ket nakangngeg da ti nagsasaruno a putok ti paltog a nangitunda ti panagwawara ken tunggal maysa ket nagbiruk ti mabalin da a paglemmengan.
Dua kadagiti biktima ket naideklarar a pimmusay iti nakapasamakan ti pammaltog idinto a ti maysa ket pimmusay kabayatan a maag-agasan iti ospital.
Saan pay a naestablisar dagiti otoridad ti motibo ken nagkedked da paylaeng a nangipaay ti pakabigbigan dagiti suspek.
