LAOAG CITY – Mairekreklamo ti maar-aramid a kalsada a nabayagen a naitantan iti Sitio Saranay ken Sitio Sadiri iti Barangay 10, Parparoroc iti ili ti Vintar.
Segun ken ni Barangay Chairman Jonvie June Retondo iti nasao a barangay, umaboten iti uppat a bulan ti napalabas sipud naitantan ti nasao a proyekto a nangrugi daytoy iti napalabas a tawen.
Inbatadna a tinubtubda ti kalsada tapno maikkan daytoy ti drainage canal kalpasan a masansan a makapaspasar ti panaglayos.
Nupay kasta, naisardeng ti pannakaipatungpal ti proyekto ti Department of Public Works and Highways – Region 1 gapu ta adda ti problema ti nailatang a pundo ken saan a naaprobaran kas maibasar iti kontraktor.
Inlawlawagna nga addan ti kiddawda a panangiyendorso ken ni Mayor Richard Degala tapno naan-anay a maipadanon daytoy iti regional office.
Kunana a gagemna a malpas ti road widening project iti kabiitan a panawen gapu ta maur-urnong ti danum iti sango ti maysa a pagadalan a marigatan dagiti estudiante a makadalyasat.
Innayonna nga adda ti sumurok-kumurang 120 a metro ti kaatiddog ti naitantan a road widening project.
