LAOAG CITY – Pimmusay ti saan a bumaba ti 7 a tao pakairamanan ti tallo nga ubbing kalpasan a tamaan ti drone ti maysa a beach resort a naruay nga addo ti tao iti Arkhipo-Osipovka idiay Krasnodar region iti abagatan a paset ti Russia.
Segun kadagiti otoridad, umabot ti 40 ti nasugatan no sadinno 17 ket naitaray iti ospital.
Mainaig iti daytoy, inakusaran ti gobernador ti Krasnador ti Ukraine ti “deliberate strikes on civilians” ngem awan pay sungbat ti Ukraine mainaig iti insidente.
Manarimaan a saan pay naamoan no ana ti target ti drone ngem basar kadagiti damag a posible a natnag daytoy iti baybay kalpasan a naapektaran ti electronic jamming wenno natamaan ti air defense ti Russia.
Kuna dagiti adda iti lugar, awan ti nangngeg a siren sakbay a napasamak ti insidente. Segun met kadagiti agduduma a testigo ket naglimmengda iti likod dagiti beach chair kabayatan a ti dadduma ket nakangngeg ti agsasaruno a putok sakbay ti napigsa a panagbettak.
Kabayatanna, agtultuloy ti rinnupak ti long-range attacks ti Russia ken Ukraine.
Iti napalabas a tawen, pinalawa ti Ukraine dagiti panagatakeda iti uneg ti teritorio ti Russia a maipagarup a nakapukos iti imprastraktura ken dagiti pasilidad nga adda iti pakainaiganna iti militar ti pagilian.
