LAOAG CITY – Pinaigetan ti Philippine National Police (PNP) ti presensia daytoy para iti umas-asideg a kaunaan a parliamentary elections iti Bangsamoro Autonomous Region in Muslim Mindanao (BARMM) inton Setiembre 14.
Inbatad ni Philippine National Police Chief General Jose Melencio Nartatez Jr., ti zero election-related incident ket mangipaneknek laeng nga ar-aramiden ti pulisia ti amin tapno masigurado ti kinakappia ken kinaurnos iti rehion.
Mainaig iti daytoy, awan pay ti na-monitor nga aniaman a pangta ti Philippine National Police para iti nasao nga eleksion.
Kabayatanna, manarimaan ti pannakikoordinar ti Philippine National Police iti Commission on Elections (COMELEC), dagiti lokal a gobierno ken Armed Forces of the Philippines (AFP) para iti panangipatungpal kadagiti addang iti seguridad.
Iti agdama, kangrunaan a maipangpangruna ti naiget a panangipatungpal ti gun ban kas addang tapno malappedan ti panagtignay dagiti kangrunaan nga us-usaren iti pammutbuteng, intimidasion ken kinaranggas nga adda ti pakainaiganna iti eleksion.
Nagpanawagan ni Nartatez iti publiko nga agtalinaed a naridam ken makitinnulong kadagiti otoridad no bilang adda ti makitada a pangta iti nasao nga aktibidad.
