LAOAG CITY – Inpakaammo ti City Disaster Risk Reduction Managment Office iti siudad ti Batac, nga awan ti nagbalin nga evacuees gapu pay laeng iti epekto ti Bagyo Maymay.
Inbatad ni Mr. Arvin Lumang ti mangidaulo ti nasao nga ahensia a gapu iti napasarn a panagtudo ket adda dagiti bassit a layos a napasaran dagiti sumagmamano a barangay, pakairamanan ti Barangay Ricarte, Capacuan, ken Parangopong.
Kunana a nangiyuswat da laeng iti pannakaiwaknit kadagiti pagdalanan ti danom gapu ta adda dagiti nagduduma a ramit wenno kaykayo a mabalin a makatubeng ti naan-nayas a panagtarayna.
Innayonna a saan a kas idi Bagyo Kiyapo nga adda dagiti naibakwit a pamilia ngem gapu ta saan a nakaro ti epekto ti Bagyo Maymay ket saanda a kinasapulan pay ti agi-evacuate.
