LAOAG CITY – Kinumpirmaran ti Iran-aligned Houthi group iti Yemen a nangiwayatda ti panagatake iti Jazan refinery ti Saudi Aramco, sumagmamano nga aldaw kalpasan a nagpirma ti Saudi Arabia iti maysa a defense pact kaduana ti Turkey ken Pakistan.
Basar iti Houthi military spokesperson a ni Yahya Saree, nagusarda iti drone tapno i-target-da ti refinery iti Jazan, southwestern Saudi Arabia.
Segun met iti Saudi Energy Ministry, napuoran ti nadakamat a refinery ngem insigida daytoy a nasebseban ken awan ti nairekord a nasugatan.
Ti Jazan refinery ket adda ti kapasidadna a mangproseso ti agingga 400,000 a barrels ti crude oil iti kada aldaw ken dati daytoyen a target ti panagatake dagiti nasao a rebelde a grupo.
Malaksid iti Saudi Arabia, inbatad pay ti Houthis a nangisayangkatda ti missile ken drone attacks kontra iti Mocha, maysa a Yemeni Red Sea port city.
Naammoan a manarimaan ti panagpaputok ti air defences kadagiti drone a maipagarup a target ti commercial quay ken storage facilities ti port.
Inbatad ni Saree a target-da dagiti suldado ti Saudi ken weapon arsenal iti lugar.
Basar iti Yemeni Transportation Ministry a nakaro ti pannakadadael iti imprastraktura ti port.
Immunan nga indeklarar ti Houthis ti naval blockade kontra iti Saudi Arabia iti Red Sea a kunada nga adda ti pakainaiganna iti blockade ti Riyadh kontra kadagitoy a naglikudan met ti Saudi government.
Dua nga aldaw sakbay ti insidente, nagpirma ti Saudi Arabia iti maysa a defense agreement kaduana ti Turkey ken Pakistan kas sungbat iti kumarkaro a regional instability gapu iti rinnupak iti baet ti Estados Unidos, Israel ken Iran.
Nakailanad iti nadakamat a katulagan a ti armado a panagatake kontra iti aniaman iti tallo a pagilian ket ibilang kas panagatake iti amin.
Kabayatanna, saan pay a nalawag no makipaset wenno kasano ti panagsungbat ti Turkey ken Pakistan no mangisayangkat ti Saudi Arabia ti addang kontra kadagiti baro a panagatake ti Houthis.
Kuna met ni Turkish Foreign Minister Hakan Fidan a saan nakapokus ti defence pact kontra iti Iran wenno aniaman a partikular a pagilian.
Innayonna a maysa daytoy a pakabuklan a suporta iti seguridad iti tallo nga agkaalyado a pagilian.
