LAOAG CITY – Mairaman iti 2027 budget dagiti proyekto ti gobierno tapno papigsaen ti flood control ken maliklikan ti nakaro a panaglayus.
Inbatad ni Department of Public Works and Highways (DPWH) Secretary Vince Dizon a kangrunaan a tutukan ti panangipatungpal ti flood control masterplans ken panangtarimaan kadagiti nadadael a flood mitigation projects.
Karaman kadagiti prioridad ti panangpasayaat ti flood control systems kadagiti urban area a masansan a makapaspasar ti panaglayus pakairamanan ti Metro Manila, Cavite, Laguna, Bulacan ken Cebu.
Saan a dinakamat ti sekretario ti gatad ti pundo nga ilatang para iti daytoy gapu ta iyur-uray pay laeng ti final budget proposal ti Department of Budget and Management (DBM) nga isubmitir iti Kongreso.
