LAOAG CITY – Insingasing ni United States President Donald Trump ti kiddawna iti Iran ti conflict compensation kas paset ti aniaman a peace negotiations.
Inanunsiona ti direkta a sungbatna iti nagbalin a kiddaw ti Iran a bayadan pay laeng ti Estados Unidos dagiti nadadael iti baet ti lima a bulan a rinnupak sakbay a lukatan ti Strait of Hormuz.
Gapu iti daytoy, nagkiddaw met ti Estados Unidos ti bukudna a bayad para kadagiti Amerikano a napatay ken nasugatan dagiti roadside bomb ken dagiti proxy a kontraen ti Iran.
Gagem ni Trump nga iraman iti mabayadan ti pamilia ti 17 suldado a natay gapu iti panagbettak iti USS Cole idi tawen 2000 ken dagiti pamilia dagiti inosente a nagprotesta iti uneg ti mismo Iran iti napalabas a 50 a tawen pakairamanan ti 52,000 a natay iti napalabas a lima a bulan.
Inpettengna a rumbeng a singiren ti Iran dagiti pannakadadael ken pannakatay kadagiti kabangibang a pagilian kas ti Lebanon, Syria, Yemen ken Gaza.
Gapu iti agsasaruno a naiget a kiddaw, arigna a saan mapasamak ti katulagan tapno malappedan ti manarimaan a rinnupak.
Kabayatanna, ngimmato ti 5% ti presio ti oil iti sangalubongan gapu iti danag nga agtalinaed a nakaserra ti Strait of Hormuz, maysa a kritikal a dalan dagiti barko nga agkarkarga ti langis.
Inbilin ni Trump dagiti pannakabagina nga aramiden a permanente ti kondision ti ‘demand’ wenno kiddawna iti amin a sumarsaruno a negosasion iti Iran.
