LAOAG CITY – Naiget nga ipatungpal ti Philippine National Police (PNP) ti panagbantay kontra kadagiti managgundaway iti presio dagiti magatgatang ken kadagiti agilemmeng ti suplay ti produkto agrikultura kagiddan ti mapaspasamak a dakes a panawen iti pagilian.
Inbatad ni Philippine National Police Chief General Jose Melencio Nartatez Jr. a pagtalinaeden ti nailian a pulisia ti naiget daytoy a zero-tolerance kontra kadagiti indibidual a manggandat nga agipangato ti presio kadagiti magatgatang.
Inlawlawagna a makikoordinar dagiti lokal nga unit ti pulisia kadagiti maseknan nga ahensia ti gobierno para kadagiti damag ti overpricing, hoarding ken profiteering.
Nagpanawagan ni Nartatez kadagiti aglaklako nga aramidenda ti patas a presio ken nainkalintegan kabayatan ti panagrekobre dagiti komunidad a naapektar iti nasao a dakes a paniempo.
Inallukoy ni Nartatez ti publiko nga i-report kadagiti otoridad no bilang maaddaan ti overpricing wenno aniaman nga iregularidad maipanggep iti daytoy.
