LAOAG CITY – Saan a mailadawan ti maysa a lalaki ti kinaragsak na kalpasan a naamoan na a nangabak ti lotto.
Ti agtawen ti 75 a lalaki ket taga Florida, ngem iti ibibisita da iti asawa na iti pamilya da idiay Michigan ket gimmatang ti Fantasy 5 ticket manipod iti Wesco gas station iti Colby Road iti Whitehall, agarop 20 a milya ti kaadayo na manipod iti northwest ti Muskegon.
Inbatad ti lalaki a masansan ti ibibisita da iti asawa na iti Michigan gapu ta isu ti ayan ti pamilya da, ken tunggal agturong da iti lugar ket saanna a malipatan ti gumatang ti Fantasy 5 numbers, ngem saanna pay a napadasan ti nangabak.
Gapu iti daytoy, saan nga inpagarop ti lalaki ti panangabak na iti lotto iti umuna a gundaway nga umabot iti $358,104.
Kuna na nga usaren na ti premyo na tapno makaakar ti pagnaedan iti northern state.
Innayon na a kalpasan a naamoan na a nangabak ti lotto babaen ti panangkita na iti Michigan Lottery app ket saanna a nalapdan ti bagina a nagik-ikkis ti ragsak na ken agpada da iti asawa na a nagsangsangit iti dayta a gundaway.
