LAOAG CITY – Mangrugi a trataren ti House Committee on Appropriation iti gakat ti national budget para inton sumaruno a tawen a P7.2 trillion ita nga aldaw, Agosto 17, ti oras ti alas-9 ti bigat.
Basar ken ni Committee Chairperson Nueva Ecija Representative Mikaela Suansing a mangrugi daytoy iti babaen ti briefing ti Development Budget Coordination Committee (DBCC) mainaig iti 2027 National Expenditure Program.
Pakabuklan ti Development Budget Coordination Committee (DBCC) ti Department of Budget and Management (DBM), Department of Economy, Planning and Development, Department of Finance (DOF) ken Bangko Sentral ng Pilipinas (BSP).
Sumaruno iti daytoy ti panangtingiting ti nailatang a pondo ti tunggal ahensia wenno opisina ti gobierno.
Mainaig iti daytoy, ti 2027 National Expenditure Program ket naisubmitir iti House of Representatives idi napalabas a lawas ti Department of Budget and Management (DBM) iti panangidaulo ni Budget Secretary Kim Robert de Leon.
Kabayatanna, immunan nga inbatad ni Rep. Suansing a target-da a leppasen ti budget hearing agingga Setiembre 8 tapno maidasar daytoy iti deliberasion iti plenario ken maipasa iti maikatlo ken maudi a panagbasa inton Oktubre 9.
