LAOAG CITY – Naiwaras aminen nga emergency response team tapno agmonitor iti epekto ti habagat ditoy ciudad ti Laoag.
Daytoy ti inbatad ni Dr. Melvin Manuel, ti mangidadaulo iti City Disaster Risk Reduction and Management Council ditoy ciudad ti Laoag.
Kuna ni Manuel a naiget pay ti panagmonitor da kadagiti low-lying barangay ken dagiti coastal area ditoy ciudad tapno al-alisto ti panagresponde da no adda dagiti residente a kasapulan a maibakwit.
Inrakurak ni Manuel a kadagitoy a gundaway ket awan met pay dagiti lugar ditoy ciudad a namonitor da a nalayos gapu iti panagtudtudo na gapu iti epekto ti habagat.
Innayon na a naiget ti pannakikoordinar da kadagiti opisyal ti barangay, aglalo kadagiti coastal area ditoy ciudad tapno kasarita da dagiti kalugaran da a saan da paylaeng a tumappog iti baybay tapno mapan agkalap gapu ta narisgo ti sitwasyon.
Mainaig iti daytoy, inpakaammo ni Manuel nga agarop 600 mm rainfall ti namnamaen para iti bolan ti Agosto, ngem iti monitor da ita laeng nga aldaw ket umabot paylaeng ti 404 mm rainfall .
