LAOAG CITY – Nagpanawagan ni Cabinet Secretary Benhur Abalos a rumbeng a maibalud dagiti responsible iti substandard ken palpak a flood control projects iti Bulacan.
Maitunos iti bilin ni Presidente Ferdinand Marcos Jr., nagkadua ni Public Works Secretary Vince Dizon ken ni Abalos a nangisayangkat ti inspeksion kadagiti nalayos iti Hagonoy ken Paombong idi Agosto 22.
Iti Paombong, nakita dagiti opisial dagiti nadadael a paset ti seawall iti Barangay Masukol ken Sta. Cruz a maipagarup a saan nga umdas tapno protehiran dagiti residente kontra iti napipigsa nga dalluyon ken ayos ti baybay.
Kuna ni Abalos a “masyadong binaboy ang Bulacan” ken rumbeng a madusa ken mabalud dagiti adda ti likudan dagiti problemado a proyekto.
Basar iti Department of Public Works and Highways (DPWH) transparency portal, innem a flood control projects ti naipatakder iti Masukol ken Sta. Cruz manipud idi 2018.
Naamoan a dua kadagitoy ket inaramid dagiti kompania a kukua da Discaya a na-blacklist ti gobierno.
Nupay kasta, maysa a P37.7 million revetment project iti Masukol a naikeddeng a malpas idi Oktubre 2025 ngem addaan laeng ti 69 a porsiento ti completion basar iti Department of Public Works and Highways (DPWH).
Impaganetget ni Abalos a saan a rumbeng a malpas ti imbestigasion iti simple nga inspeksion.
Kabayatanna, kuna ni Dizon a mapilitanda nga tarimaanen dagiti kontraktor dagiti naperdi a proyekto no sakup pay ti warranty dagitoy.
Malaksid iti daytoy, imbestigaranda pay dagiti aniaman a kamali iti konstraksion pakairamanan payen ti posible a negligence wenno anomalia.
Plano pay ti Department of Public Works and Highways (DPWH) a mangikabil ti hexapods kadagiti vulnerable a lugar tapno makissayan ti epekto ti dadakkel a dalluyon ken ayos.
Kabayatanna, isaysayangkat ti gobierno ti ad-adda a nalawa a flood-control master plan para iti Bulacan pakairamanan ti Pampanga River Basin Master Plan ken ti Manila Bay Coastal Defense Dike Project.
