LAOAG CITY – Natay ti nangiturong ti bisikleta kalpasan a nadungpar ti maysa nga SUV iti paset ti Laoag-Suba-Paoay Road ti Barangay 48-B Cabungaan South ditoy siudad ti Laoag.
Ti SUV ket maysa a Honda CR-V nga inmaneho ti maysa a lalaki nga agtawen ti 35, ken residente ti Barangay 157, Bio, Tagudin, iti probinsia ti Ilocos Sur.
Idinto a ti bisikleta ket inturong ti maysa met laeng a lalaki nga agtawen ti 61, naasawaan, ken residente ti Barangay 48 – B, Cabungaan ditoy siudad ti Laoag.
Naammoan iti inisial nga imbestigasyon nga agdaldaliasat ti SUV nga agpaabagatan a kalsada idi kellaat a bimmallasiw ti nakabisikleta nga agturong ti laud a rason ti nakadugparan ti biktima.
Gapu iti daytoy, naipurwak ti nakabisikleta a nakasugatan ti nagduduma a paset ti bagina.
Insigida met a naitaray daytoy iti Laoag City General Hospital para iti pannakatamingna ngem naideklarar a dead-on-arrival iti isu met laeng nga aldaw.
