LAOAG CITY- Mapukpukaw ti maysa a manggalap a residente ti ili ti Pasuquin.
Daytoy ket nabigbig a ni Jessie Bonnin Corpuz Perucho, agtawen 41, awanan asawa, ken residente ti Brgy. 5 Davila iti ili ti Pasuquin.
Inbatad ni Kagawad Elmiro Agoo, a daytoy ket naudi a nakita daytoy iti agarup 40 nautical miles off manipud iti isu met laeng a nasao a lugar.
Segun kenkuana, 3 a bangka nga agkukuyog ti napan nagkalap iti agarup 4:30 iti parbangon iti kabaybayan no sadinno a ni Perucho ket helper iti maysa a bangka.
Apaman nga umasideg da iti rama ket kellaat a natinnag ni Perucho a gapuanan ti panagderderetsona iti uneg ti danom. Natinnag pay ti flashlight ti biktima a nangitunda ti pannakarigatda nga agsapol kenkuana.
Kuna ni Kagawad Agoo a saan nga ammo ti aglangoy ti biktima ken kasta payen a saan a naka life vest daytoy.
Inlawlawag ti Kagawad a basar kadagiti kadwa ti biktima ket inaramidda ti kabaelanda tapno masarakan daytoy ngem saanda a nagballigi isu ti gapuna nga insigida ti panag-report da iti napasamak.
Nai-report ti insidente iti Municipal Disaster Risk Reduction Management Office para iti koordinasion ti nagduduma nga ahensia tapno maiwayat ti search and rescue operation iti biktima.
Naamoan pay a ti biktima ket nabayagen a mapan sumursurot nga agkalap gapu ta maenganyo daytoy iti mabalin a manggedanna.
