Paigetan ti Northern Police District (NPD) babaen ti panangidaulo ni District Director PBGen. Benliner L. Capili ti panagbantay dagiti pulis a naka-duty iti rabii babaen ti panangipatungpal ti Night Watch Guidelines and Procedures.

Binilin ni Capili dagiti Assistant Chiefs of Police for Operations (ACOPO) dagiti nagduduma nga istasion ti pulisya iti Caloocan, Malabon, Navotas ken Valenzuela para iti inaldaw a random inspeksyon.

Gagem ti addang a pagtalinaeden ti kinaalerto, kinadisiplina ken ti kinasagana dagiti kameng ti nailian a pulisya iti panagtrabaho da iti rabii.

Karaman kadagiti manamnama a kitaenda ket ti presensia ken ti kinasagana dagiti pulis iti panangsurot kadagiti karbengan ken ti operational procedures, pakairamanan dagiti possible a problema a mabalin a makaapektar iti alisto a panagresponde ken panangipaay ti serbisyo.