LAOAG CITY – Inbatad ti aktres a ni Lovi Poe a dakkel ti nagbaliwan ti panagbiag na sipud nagbalin nga ina.
Inlawlawag na nga ado dagiti nabaliwan iti panagkita ken pangirigan na iti panagbiag, inwalin nan ti panagbalin a perpekto, ken ad-adda a flexible iti panangsango kadagiti karit iti biag iti inaldaw.
Inadmitir ni Lovi a ti panagbalin na nga ina ket naminpinsan a binaliwan na ti routine na iti inaldaw.
Innayon na nga idi awan pay ti anakna ket amin nga aramiden na ket nakaplano ken naorganisar, ngem ita ta naan-anayen nga ina ket saanna pulosen a planplanwen dagiti aramiden na iti inaldaw.
Immunan nga inrakurak ni Lovi a kayatna a mapadas amin ti nagduduma a tukad ti panagaywan para iti kaipasngay nga anak da iti asawa na a maysa a British producer a ni Monty Blencowe, isut gapu na a temporaryo a nagsardeng iti showbiz.
Inpasingked ni Lovi nga awan pulos ti panagbabawi na iti dakkel a nagbaliwan ti panagbiagna gapu ta amin dagitoy ket para iti binukelda a pamilya ken ni Monty, aglalo iti anak da.
