LAOAG CITY – Inlawlawag ti aktres a ni Lovi Poe no apay a saanna nga ipakpakita ti rupa ti anak na a ni Sloane iti social media.
Iti episode ti “Fast Talk with Boy Abunda” inbatad ni Lovi a daytoy ket gapu kadagiti rumrumuar nga isyu iti internet ken privacy.
Kuna na pay a napagsaritaan da a naimbag daytoy a banag iti asawa na a ni Monty Blencowe.
Nadakamat pay ni Lovi nga Sloane ti nagan ti anak da, gapu ta ti kaipapanan daytoy ket “warrior”.
Inrakurak na nga adda ti listaan dagiti nagan kadakuada iti asawa ngem ti Sloane ti nagustwan da a dua.
Innayon ni Lovi a kayat na a dumakkel ti anak da a maimula iti panunot na nga isuna ket “fighter” ken natibker.
Maipalagip a nagkasar da Lovi ken ni Monty Blencowe idi 2023.
