LAOAG CITY – Kinontra ti defense team ni Vice President Sara Duterte ti panagusar ti House prosecution panel kadagiti saan a nainkalintegan a balikas iti agtultuloy nga impeachment trial iti Senado.
Iti maika-18 nga aldaw ti panagusig iti Bise Presidente, kinontra ni Defense Counsel Atty. Kristine Ferrer ti panagsaludsod ni Prosecution Counsel Atty. Mae Divinagracia iti testigo a ni Office of the Vice President (OVP) Assistant Chief of Staff Lemuel Ortonio.
Kinontra ti depensa ti panangidakamat ti prosekusion iti balikas a “mastermind” ken “architect” tapno iladawan ti Bise Presidente mainaig iti panagusar ti confidential funds.
Mainaig iti daytoy, sinang-ayunan ni Presiding Officer Francis “Chiz” Escudero ti mosion ti depensa.
Kabayatanna, niliklikan met ni Atty. Michael Poa iti defense team ti panagitedna ti komento mainaig iti panagusar ti prosekusion kadagiti nasao a balikas.
Inlawlawag ni Poa nga adda ti kabukbukodan a diskarte dagiti abogado iti agsinnumbangir a partido iti panangiyebbatda kadagiti balikas iti korte, ngem mamatida nga agtalinaed a natalged ken umno dagiti balikas a maaramat kadagiti sumarsaruno a panangdengngeg.
