LAOAG CITY – Inbatad ni Director Julius Paderes, ti Regional Director iti Philippine Drug Enforcement Agency-Region 1 a saan a basta maaramid ti maibagbaga a panagimula ti ebidensya kadagiti maisaysayangkat nga anti-illegal drug operation gapu ta nadagsen ti pannusa a maipataw iti siasinno man a mapaneknekan a mangipatungpal iti daytoy.
Sungbat daytoy ni Paderes kalpasan a nasaludsud kenkuana mainaig kadagiti reklamo dagiti agbalbalin a subject ti operasyon a maipagarop a naimula laeng kadakuada dagiti ebidensya a nakumpiskar dagiti otoridad.
Inpaganetget na a ti pannusa iti panagmula ti ebidensya ket tungpal biag a pannakabalud ken multa ti 500 a ribo a pisos agingga iti 5 a milyon a pisos.
Inpanamnama ni Director Paredes nga awan ti tao da a makaitured nga agimula ti ebidensya gapu ta kanayun ti panangpalagip da kadagitoy ken mamati a saanda a dadaelen ti karera da babaen iti panangipatungpal da iti saan a nasayaat nga aramid.
Inpalagip ni Director Paredes a dagiti agimula ti ebidensya ket awan ti pakaidumaan da kadagiti ordinaryo a kriminal.
