LAOAG CITY – Naipaayan ti food packs dagiti mangngalap ditoy siudad ti Laoag a naapektaran gapu ti bagyo ken iti epekto ti habagat.
Segun kenni Engr. Shiela Opelac, mangidadaulo iti City Agriculture Office ditoy suidad, nga umabot iti 644 a registered fisherfolks ti nabenepisiaran iti aktibidad.
Inabatadna a dagiti food packs ket manipud iti lokal a gobierno, provincial government ken Bureau of Fisheries and Aquatic Resources – Regional Fisheries Office 1 wenno BFAR-RFO 1.
Segun ken ni Opelac a dakkel a tulong daytoy kadagiti mangngalap gapu ta saanda a nakakalap iti sumagmamano nga aldaw gapu iti dakes a panawen no sadinno daytoy ti kangrunaan a pagsapulanda.
Innayonna a daytoy ket kalikagum ni Mayor James Bryan Alcid a tulungan dagiti Laoagueños nangnangruna kadagiti naapektaran ti pagsapulanda.
