LAOAG CITY – Ilunglungalong ti Department of Education (DepEd) ti pannakaipapigsa ti implementasion ti Academic Recovery and Accessible Learning (ARAL) Program kalpasan a nakitaan daytoy ti dakkel a panagdur-as iti panagbasa dagiti estudiante idi School Year 2025-2026.
Basar iti resulta ti maysa nga independent evaluation ti Youth Impact, kabinnulig ti World Bank, babaen iti tulong ti ARAL program, bimmaba iti 9% ti bilang dagiti estudiante a marigatan nga agbasa
.
No sadinno ket katukad daytoy ti 1.37 millon a naikkat nga ubbing manipud iti kababaan nga antas ti panagbasa.
Ngimmato pay iti 4.8% ti antas ti pannakabalin dagiti estudiante a maibilang a nalaing iti panagbasana bayat iti lebel ti tawenna, a katukad iti agarup 730,000 a kanayonan nga estudiante.
Segun kadagiti evaluator, nakita ti nasayaat a resulta ti programa iti amin a rehion ti pagilian.
Iti baet daytoy, tapno mapapigsa pay ti nasao a programa, inpaay ti Youth Impact iti DepEd ti rekomendasion a papigsaen pay ti ARAL Program babaen iti pannakaipaay ti umdas ken umno paniempo ti panag-klase tapno masigurado ti epektibo a panangisuro iti panagbasa.
Kabayatanna, para iti Youth Impact, napateg ti panagusar kadagiti data system ti departamento tapno dagus a maipaay ti tulong kadagiti pagadalan ken lugar a makasapol kadaytoy.
