LAOAG CITY – Inbatad ni Mr. Denver Dela Cruz, ti Presidente ti Sanghera iti San Marcelino iti ili ti Dingras ken agdama a Rice Coordinator ti Regional Agricultural and Fishery Council, a dakkel ti epekto na kadagiti maapit da nga irik ti awan sarday a panagtudtudo na ditoy probinsya.
Inlawlawag na a gapu iti panagtudtudo na ket saan da a maibilag a dagus dagiti maapit da nga irik isut gapuna nga adda dagiti agngisit ken saandan a malako pay.
Kuna na a pudno nga adda ti dryer nga inpaay ti gobierno iti Department of Agriculture ngem saan a makaumanay daytoy.
Inrakurak ni dela Cruz a ti ar-aramiden da ket mai-schedule ti panagusar dagiti mannalon iti panagusar ti dryer tapno mapamagaan dagiti maapit da nga irik.
Inpakaammo ni dela Cruz nga iti agdama ket 30 a porsiento paylaeng dagiti nakagapas gapu iti awan sarday a panagtudtudo na ditoy probinsia nga epekto ti habagat.
Mainaig iti daytoy, kuna ni dela Cruz a ti pakaupayan ken pakaladingitan da ket idi awan pay unay ti naggapas ket umabot iti 21 pisos iti kada kilo ti saan a napamagaan nga irik idinto a ti nabilagen ket P30 a pisos.
Nupay kasta, inpetteng na nga ita ta kaadon ti maapit nga irik dagiti mannalon ket naipababa metten iti P15 agingga iti P15.50, ken umabot pay ti P16 a pisos iti kada kilo ti saan pay a nabilag no ado ti ilako.
Innayon na a no isuda koma ti masurot ket uray nasurok koma a 20 a pisos dagiti presko nga irik tapno maabrot da met dagiti magastos da nga agtalon, aglalo ket agkakangina dagiti usaren da, karamanen ti abono.
