LAOAG CITY – Innaganan ti Malacañang ti 10 a baro a National Artists iti pagilian.
Pakairamanan dagitoy ket da Nonoy Froilan iti Dance; Gabby Formoso iti Architecture; Patis Tesoro iti Design; Armando Bing Lao iti Film and Broadcast Arts; Gregorio Brillantes ken Nicanor Tiongson iti Literature; Fred Buenaventura iti Music; Teddy Hilado iti Theater; Imelda Cajipe Endaya ken Nunelucio Alvarado iti Visual Arts.
Daytoy ket nasurat iti Procralamation 1413 nga adda petsana a Setiembre 1 ken pinirmaan ni Presidente Ferdinand Marcos Jr. tapno iproklamar dagiti 10 a Filipino kas National Artists.
Ti Order of the National Artist ti kangatoan a pammigbig kadagiti Pinoy nga adda naidumduma a kontribusion iti arts ken surat.
Mainaig iti daytoy, makagun-od ti Grand Collar ken gold-plated a medallion dagiti National Artists.
Malaksid iti daytoy, maipaayanda pay dagitoy ti cash award, monthly life pension, medical ken hospitalization benefits ken life insurance coverage.
Kabayatanna, maipaayanda ti state funeral ken pambigbig iti national state functions.
