LAOAG CITY – Impangato ti Bureau of Internal Revenue (BIR), iti heightened alert ti amin nga enforcement units-na kontra iti panagwaras dagiti iligal a vape ken produkto ti tabako iti baet ti panagado dagiti aggatang iti panagserrek ti ‘Ber’ months ken gapu iti umadani a paskwa.
Inbatad ni Commissioner Charlito Martin R. Mendoza a nakaawat ti ahensiada kadagiti intelligence information mainaig iti panagngato ti pangta ti panagserrek dagiti iligal a vape ken tobacco iti merkado bayat a ngumatngato ti demand-na dagitoy iti holiday season.
Inpettengna a awan ti holiday wenno inana ti kampanyada ken aramidenda ti amin a kabaelanda tapno maipatungpal dagiti linteg kontra kadagiti aglablabsing iti iligal a vape ken tobacco.
Gapu iti daytoy, binilin ti Bureau of Internal Revenue (BIR) dagiti nagduduma a regional ken enforcement office a paigetenda ti panagbantayda kadagiti maipagarup pagaramidan wenno paggapgapuanna dagitoy, pakairamanan kadagiti warehouse, distribution channels ken kadagiti retail outlet iti intero a pagilian.
Ti nasao a panagtignayda ket kalpasan ti agtultuloy a pannakarekobre ken panangdadael ti Bureau of Internal Revenue kadagiti makumkumpiskarda a vape ken sigarilyo ken panangipila kadagiti kaso a kriminal kontra kadagiti negosiante a saan nga agbaybayad ti umno a buwis.
Kabayatanna, nagpanawagan ti ahensia kadagiti lehitimo a negosiante iti industriya, kadagiti aglaklako uray man pay saggibassit ken iti publiko nga agisubmitirda ti impormasion wenno agi-report iti BIR mainaig iti aniaman a makitada nga iligal a paggapgapuan ken aglaklako kadagiti vape products ken tabako kadagiti lokalidadda.
