LAOAG CITY – Indeklarar ti Fiji ti National HIV emergency gapu iti alisto a panagngato ti bilang dagiti maap-apektaran ti Human Immunodeficiency Virus (HIV).
Basar iti report, maysa iti kada 60 a nataengan iti Fiji nga addaan ti agarop maysa a milyon a populasyon ket nakaptan ti nasao a virus.
Immuna nga indeklarar ti Fiji ti outbreak iti nasao a virus idi Enero 2025.
Mainaig iti daytoy, inwaragawag ni Health Minister Dr. Atonio Lalabalavu nga adda ti pakabuklan a 2,060 ti baro a na-diagnoses ti Human Immunodeficiency Virus idi 2025, nga ibilang na a seryoso ken kasapulan a masolusyonan.
Kinumpirmaran pay ti Health Minister nga iti agdama ket adda ti dua a bolan na paylaeng a maladaga a naapektaran ti nasao a virus ken isu ti maibilang kas kaubingan nga agbibiag nga addaan ti Human Immunodeficiency Virus ken tuberculosis (TB).
Naamoan nga iti napalabas a tawen ket adda ti 59 a maladaga a naapektaran ti Human Immunodeficiency Virus a naala da manipod iti ina da.
Ti Fiji ket mabigbig kas tourism hotspot gapu ta daytoy ket friendly culture, addaan kadagiti white-sand beaches ken teeming coral reefs.
