LAOAG CITY – Inpasingked ti Malacañang a suportaran ni Presidente Ferdinand Marcos Jr. ti direktiba ti Korte Suprema iti kongreso nga ipasa ti anti-dynasty bill.
Kuna ni Palace press officer Claire Castro a daytoy ti maysa a makitkita da a prayoridad ni Presidente Marcos Jr.
Saan metten a nangipaay ti dadduma a komento ti Malacañang gapu ta saan da pay a nabasa ti naan-anay a desisyon ti Kongreso iti deliberasyon ti nasao a gakat.
Ti maipagarop a panagkedked ti kongreso a mangipatungpal ti constitutional duty na iti napalabas a 39 a tawen ket maibilang kas “grave abuse of discretion” ken “manifest injustice.”
Nupay kasta, inpetteng ni Castro, a ti timetable para iti legislative action ket nakadependar iti kongreso.
Maipalagip nga idi bulan iti Hunyo ket naaprobaran iti maikatlo a pannakaibasa iti bersion ti anti-political dynasty bill ti kamara de representantes.
