LAOAG CITY – Nagkedked ti Department of Foreign Affairs (DFA) a mangipaay ti detalye iti status ni dati nga Ako Bicol party-list Rep. Zaldy Co, a naireport nga adda idiay France kabayatan ti panangsango na kadagiti kaso kontra kenkuana gapu iti maipagarop a pannakairaman na iti maanomalya a flood control projects.
Iti deliberasyon iti nailungalong a budget ti DFA, sinaludsud ni Akbayan party-list Rep. Perci Cendaña no ania ti sitwasyon ni Co iti France ken no adda ti timeline para iti panagsubli na iti Pilipinas tapno sangwen dagiti kaso na.
Segun ken ni Misamis Occidental Rep. Sancho Fernando Oaminal, nga isponsor ti pondo ti DFA, saan a mabalin nga iburay ti ahensya ti detalye gapu ta naiget ti pammilin a confidential iti babaen ti French law ti asylum applications.
Inpetteng pay ni Cendaña a napateg ti papel ti DFA iti panangtulong a mapagawid iti Pilipinas dagiti tattao nga adda iti sabali a pagilian tapno sungbatan dagiti sangsangwen da a kaso.
Ni Co ket pada nga akusado da dati nga House speaker Martin Romualdez iti P7.4-bilyong plunder case nga inpila ti Ombudsman mainaig iti maipagarop a kickback scheme kadagiti government infrastructure projects, karaman ti flood control.
Pimmanaw iti pagilian ni Co idi Hulyo 2025 ken saan pay a nagsubli ditoy Pilipinas agpapan kadagitoy a gundaway.
