LAOAG CITY – Kiniddaw ni Senate Minority Leader Alan Peter Cayetano ni Sen. Panfilo “Ping” Lacson nga imbestigaren met ti flood control projects iti sabali pay a distrito iti pagilian tapno maliklikan ti alegasion ti ‘Selective justice’.
Segun ken ni Cayetano, mabalin nga agpili ni Lacson ti dua wenno tallo a lugar malaksid iti Taguig ken Davao ken ipadalan dagitoy iti kapada nga imbestigasion.
Kunana nga ado a distrito iti pagilain ti addaan flood control projects ken saan laeng a ti lugar a konektado iti sumagmamano a personalidad ti pagpokusan ti imbestigasion.
Kageddan daytoy, inkalintegan ni Cayetano ti flood control efforts iti Taguig, no sadinno a dakkel ti nagbabaan ti kalawa dagiti lugar a dati a malaylayos.
