Inlawlawag ni Ms. Elma Gabriel, ti mangidadaulo iti Micro, Small, and Medium Enterprises Office (MSMEO) iti gobierno probinsyal nga ipinpinal dan dagiti dokumento a kasapulan para iti pannakaipasdek ti Likhang Filipino Project ditoy probinsya.
Segun kenkuana, targetda a makumpleto dagiti nasao a dokumento iti umuna a paset ti agdama a bolan ti Nobyembre.
Ti Likhang Filipino ket maysa a showroom ken market place a pakakitaan kadagiti produkto manipod iti nagduduma a paset ti Pilipinas, nangruna dagiti produkto a mabalin nga ipatulod iti sabali a pagilian.
Iti nasao a proyekto, plano ti Ilocos Norte ti mangikabil kadagiti wearable products kas kadagiti bado, nangruna dagiti baro a disenio a naaramid babaen ti Inabel.
Segun ken Ms. Elma Gabriel, adda ti inisiatiba ni Governor Cecilia Araneta-Marcos a makitinnulong kadagiti nagturpos iti Technical Education and Skills Development Authority (TESDA) iti panagdait ken kadagiti top designer iti Ilocos Norte.
Kunana a pagtitinnulongan da ti mangaramid kadagiti baro nga smart-casual wearables babaen iti panagusar ti Inabel, gapu ta ti gagem ti proyekto a Likhang Filipino ket maipakita dagiti espesial wenno limitado a koleksion.
Malaksid kadagiti bado, adda pay dagiti food products a mabalin a maikabil iti nasao a proyekto, karaman ditoyen dagiti mais ken mangga a mabalin a mailako iti nagduduma a merkado ditoy Pilipinas, kasta pay kadagiti merkado iti ballasiw taaw.
