LAOAG CITY – Pinabasol ti China coast guard ken ti Chinese Embassy iti pagilian ti Philippine vessel iti napasamak a panagdungpar iti West Philippine Sea idi Setiembre 18.
Basar iti Chinese embassy, maipagarup a nangisayangkat ti “Unprofessional Maneuver” ti Philippine vessel no. 3015 ken gagangay a dimmalyasat iti pagdalyasatan ti Chinese coast guard vessel Sanzhou’a a nagbalin a rason ti collision.
Inpetteng ti Chinese Coast Guard a namin-adu a daras a nagpakdaar daytoy ti Philippine vessel sakbay daytoy a kellaat a nagbaliw ti direksion ken immalisto ti taray.
Kuna ti Bejing nga adda iti partido ti Pilipinas ti pakabuklan a panagsungbat iti insidente ken ginutigotna ti Manila nga isardeng ti maipagarup a “provocative acts.”
Kabayatanna, segun iti Philippine Coast guard a dinungpar ti Chinese vessel ti BFAR vessel BRP Datu Magat Salamat kabayatan nga mangisaysayangkat daytoy ti maritime patrol ken fuel subsidy mission para kadagiti mangngalap a Pilipino nga adda iti 54 nautical miles manipud iti Palawan.
Inbatad ti Philippine Coast guard a maipagarup a nangisayangkat ti delikado a panag-maneuver ti Chinese vessel sakbay ti panagdinnungpar a nangitunda ti pannakadadael iti railing at deck structures ti BFAR vessel.
Kabayatanna, awan ti nairekord a nasugatan iti insidente.
