LAOAG CITY – Madanagan dagiti kongresista iti napasamak a pammaltog iti Banga National High School idiay South Cotabato no sadinno ket nagpanawagan dagitoy ti naigiget nga addang para iti kinatalged dagiti estudiante.
Segun ken ni House Speaker Faustino “Bojie” Dy III, saan nga isolated incident ti nasao a pammaltog gapu ta addan dagiti immunan nga insidente ti kinaranggas iti uneg wenno aglawlaw dagiti pagadalan idi laeng napalpalabas a bulan.
Gapu iti daytoy, ginutigot ni Dy ti publiko ti saanda a panangiwaras ti sensitibo wenno graphic a ladawan ken video, pakairamanan dagiti saan a beripikado nga impormasion mainaig iti insidente.
Kaduana ni Majority Leader Ferdinand Alexander “Sandro” Marcos, nangipila ni Dy ti House Bill No. 11387, wenno ti Responsible Firearm Ownership and Safe Storage Act, a kalikagumna a paigetan ti panagusar ken lappedan ti akses dagiti ubbing kadagiti armas.
Kabayatanna, nagpanawagan met ni Bagong Henerasyon Party-list Rep. Robert Nazal ti pannakaipasa ti House Bill No. 10543, wenno ti Safe Schools and Violence Prevention Act of 2026, a naipila idi bulan ti Agosto.
