LAOAG CITY – Nakaserra wenno lockdown ti Malacañang complex ita nga aldaw ti Lunes, Setiembre 21, kagiddan ti manamnama a napalawa a tignay-protesta para iti maika-54 nga anibersario ti deklerasion ti Martial Law.
Basar iti Presidential Communications Office wenno PCO a nakarikep ita nga aldaw ti New Executive Building (NEB), a nakalugaran dagiti sumagmamano nga opisina ti Malacañang, kas paset ti standard security protocols.
Malaksid idi daytoy, sinuspenso pay ti operasion ti Presidential Action Center, kabayatan a malimitaran ti access kadagiti kalsada ken gate nga agturong iti Malacañang kas paset ti pinaiget a seguridad.
Manamnama nga agtitipon ti nagduduma a grupo iti Liwasang Bonifacio sakbay ti panagmartsa nga agturong iti Mendiola Peace Arch tapno mangisayangkat ti programa mainaig ti Martial Law anniversary ken dadduma pay nga isyu nga ilungalongda.
Immuna iti daytoy, nasuspenso ti face-to-face classes iti amin nga lebel iti pampubliko ken pribado a pagadalan iti Manila gapu iti manamnama nga epekto dagiti aktibidad iti seguridad ken trapiko.
Kabayatanna, immunan nga inbatad ti Malacañang a resrespetaren ni Presidente Ferdinand Marcos Jr. ti karbengan ti publiko iti nakappia a panagtitipon ken panangibatad dagiti reklamo, kabayatan a nagpanawagan daytoy ti panangliklik ti kinaranggas kadagiti demontrasion.
