LAOAG CITY – Umaboten iti 2,013 a kaso ti dengue ti nairekord ditoy Ilocos Norte manipud Morbidity Week 1 agingga Week 37.
Daytoy ket maibasar iti kaudian a datos ti Provincial Epidemiology and Surveillance Unit (PESU) iti kapitolyo probinsyal.
Karaman iti nasao a bilang ti dua a pimmusay manipod iti ili ti Piddig ken ili ti Nueva Era.
Gapu iti daytoy, inbalakad ti Provincial Health Office ti agtultuloy a panangipatungpal kadagiti usto a wagas tapno malapdan ti panagadu dagiti kaso.
Karaman ditoy ti panangikkat dagiti pagyanan ti danum a pagitlogan dagiti lamok, taktaken ken dalusan dagiti banag a mabalin a pagurnongan ti danum, siguraduen a namaga ken nadalos ti aglawlaw tapno saan a pagyanan dagiti lamok ken no adda adda sintomas ti dengue kas iti agnanayon a gurigor, nakaro a sakit ti ulo, wenno panagbakwar, mapan a dagus iti kaasitgan nga health facility.
Ti pannakasalaknib kontra dengue ket responsibilidad ti tunggal maysa.
