LAOAG CITY – Manamnama iti pannakaipasdek iti opisina iti Negosyo Center iti Laoag City Hall a mangipaay ti suporta ken tulong kadagiti agnegnegosyo, pakairamanan dagiti agdama ken dagiti agplaplano pay laeng a mangrugi iti negosyo na.
Segun kenni Ms. Maricor S. Racela, Senior Trade and Industry Development Specialist ken Unit Head ti Market Development and Business Environment Unit, sidadaan ti Negosyo Center a tumulong kadagiti negosyante iti nagduduma a concern, kas iti panangipaay iti business advice ken panangiturong kadagiti umno a proseso iti panagnegosyo.
Kunana nga iti panawen ti panag-renew iti negosyo, aglalo iti Disiembre agingga Pebrero, mabalin met a bayabayen ti Negosyo Center dagiti Micro, Small, and Medium Enterprises (MSMEs) tapno maliklikan ti aniaman a problema iti panangituloy da ti negosyo.
Inbatad ni Racela a no adda reklamo mainaig iti Fair Trade Laws, mabalin nga awaten daytoy ti Negosyo Center ngem maipatulod iti Consumer Protection Division ti DTI Provincial Office, nga isu ti espesyalisado a mangtaming kadagiti kastoy a reklamo.
Inlawlawag na a ti Department of Trade and Industry ket addaan ti dua a dibisyon, dagitoy ket ti Business Development Division, a mangted iti suporta ken business assistance, ken ti Consumer Protection Division, a mangtaming kadagiti consumer-related complaints.
Kabayatanna, inbatad ni Racela a ti pannakaipasdek ti Negosyo Center iti Laoag City Hall ket maysa a wagas tapno mapalawa pay ti access dagiti negosyante iti serbisyo ken programa ti Department of Trade and Industry.
