LAOAG CITY – Inbatad to aktres a ni Ryza Cenon nga awan pay ti plano da iti partner na a ni Miguel Antonio Cruz nga agkallaysa iti baet a nabayagen nga agdendenna da ken ag-innem a tawenen ti anak da a ni Night.
Para iti aktres, napatpateg nga ad-adda pay a patibkeren da ti nobyo na iti pundasyon ti panaginnayan-ayat da.
Kuna na a narigat ti sumrek iti marriage a saan da nga agpada a nakasagana mentally ken emotionally gapu ta ti kangrunaan a maapektaran ket ti anak da.
Mainaig iti daytoy, inpasingked ni Ryza a saanna pulosen nga aramiden ti agpa-sexy gapu iti anak na a ni Night, uray mapukawan ti proyekto iti show business.
Iti agdama, makumikum ni Ryza iti nagduduma a negosyo na, gapu ta malaksis iti panaglako na ti bag ket adda pay ti MidNight Café na ken agpapaorder iti nagduduma a makan.
