LAOAG CTITY – Impakaammo ni Mrs. Imee Nicolas, ti Information Officer Schools Division of Laoag City nga ad-adda a paigetanda ti seguridad kadagiti pagadalan kalpasan ti pammagkong a napasamak iti Balatong Integrated School.
Namunganay daytoy ti napasamak a pammagkong iti Balatong Integrated School ditoy siudad ti Laoag no sadinno a ti suspek ket maipagarop a Grade 10 idinto a ti biktima ket Grade 11.
Segun kenkuana, prioridad da ti kinatalged dagiti agad-adal ken kalikagumda ti naig-iget a pannakaimplementar ti security protocols kadagiti pagadalan.
Ado dagiti masdaaw ti napasamak a pammakong gapu ta daytoy ti kaunnaan a violence report iti uneg ti pagadalan.
Apaman a napasamak ti insidente, nagkiddaw nga dagus ti Schools Division of Ilocos Norte kadagiti Department of Social Welfare and Development (DSWD), Philippine National Police (PNP), City Disaster Risk Reduction Management Office (DCRRMO), Barangay Officials, Parent-Teachers Association (PTA), ken kabangibang a barangay para iti naiget a seguridad dagiti estudiante.
Kunana nga insigida met a nagsungbat dagitoy ken nag-deploy dagitoy ti agbantay kadagiti nagduduma apagadalan.
Impasigurado pay ni Mrs. Nicolas nga agtultuloy ti pannakaprotehir kadagiti agad-adal ken binalakadanna ti publiko nga agbalin a naannad ken nasirib iti panangipaay ti aniaman a komento mainaig iti napasamak a pammagkong.
Iti agdama, kinunana a manarimaan ti panangisaganada ti official statement iti publiko kalpasan a masigurado a kompleto ken naurnos ti naiwayat nga imbestigasion.
