LAOAG CITY – Saan pay nga insuko ni Senador Ronald “Bato” dela Rosa ti kaadoan kadagiti paltog na a nakarehistro iti nagan na.
Daytoy ti inbatad ni Philippine National Police-Civil Security Group (PNP-CSG) Director Maj. Gen. Aden Lagradante.
Segun ken ni Lagragante, manipod iti 117 a paltog a nakarehistro ken dela Rosa ket 26 paylaeng ti naisuko na isut gapuna nga adda pay ti 91 nga ik-ikutan na.
Maipalagip a kinanselar ti PNP-Firearms and Explosives Office (PNP-FEO) ti lisensya ken rehistro dagiti paltog ni Dela Rosa maibasar iti pammilin idi Mayo 26 a pinirmaan ni Firearms and Explosives Office chief Brig. Gen. Jose Manalad Jr.
Innayon na a nagkiddaw ti reconsideration ti kampo ni Dela Rosa iti revocation iti babaen ti surat iti PNP-Firearms and Explosives Office.
Iti agdama, aglemlemmeng ni del Rosa kalpasan ti pannakaiparuk-at ti arrest warrant manipod iti International Criminal Court gapu iti pannakainaig na iti nadara a war on drugs ti administrasyon ni dati a Presidente Rodrigo Duterte.
