LAOAG CITY – Napadayawan ti probinsia ti Ilocos Norte kalpasan ti pannakagun-od ti 96.7% wenno 22,039 a kababbaihan nga agtawen 9 agingga 14 a nabakunaan ti Human Papillomavirus (HPV) vaccine.
Gapu iti daytoy, naartapan ti 90% a target ti World Health Organization a porsiento ti nabakunaan a kababbaihan.
Naragsak iti Governor Cecilia Araneta-Marcos gapu iti pammadayaw a naawat ti probinsia ken mangnamnama daytoy ti agtultuloy a progreso ti probinsia iti panangkontra ti cervical cancer no sadinno naamoan a bumabbaba ti tawen dagiti babbai nga addaan kadaytoy a sakit.
Nakaawat met dagiti 24 a nagduduma nga ili ken siudad iti probinsia ti sertipiko kas pammadayaw iti nangato a porsiento ti naipaayan ti vaccine ti lugarda.
Nupay kasta, inrakurak ni Dr. Maria Constancia Celina C. Ferraris, Regional Director ti North Western Luzon Chapter ken Philippine Obstetrics & Gynecology, a ti bakuna para iti cervical cancer ket addan idi tawen 2005 ken manipud tawen 2006 ket awan pay iti nairekord a madi nga epektona.
Dinakamatna iti pagilian ti Australia no sadinno a nagun-od dan ti 100% vaccination ken targetda nga awan to ti kaso ti cervical cancer ti pagiliandan inton 2030.
Inrekomendarna met a dagiti saanna kayat ti agpabakuna iti agdama a mabalindan nga agpa-screening tapno makita no addaanda iti sintomas gapu ta ti maysa a pamunganayan ti cervical cancer ket dagiti unhealthy habits.
Kabayatanna, inbatad met ni Dr. Jose B. Orosa III, agdama nga Officer-in-Charge ti Medical Cancer Center ti Mariano Marcos Memorial Hospital & Medical Center a saan laeng a babbai iti makaala ti Human Papillomavirus (HPV) no diket pati dagiti lallaki uray pay saan a gagangay daytoy.
Mainaig iti daytoy, kunana a saan a cervical cancer ti pagtinnaganna no di ketdi mouth, tongue, wenno throat cancer iti maala dagiti lallaki.
Inpangpangrunana nga inbatad a ti maysa a lalaki ket mabalin daytoy nga agbalin a carrier ti virus.
Pinasingkedanna a dagiti lallaki a makikipagnaig kadagiti pada a lalaki iti maikonsiderar nga high risk.
Kabayatanna, gutgutigotenda dagiti saan pay a nagpabakuna aglalo kadagiti agtawen 9 agingga 14 a babbai.
Inpasiguradoda pay ti agtultuloy a pannakaisayangkat ti lectures ken seminars tapno mailawlawag ti kinapateg Human Papillomavirus (HPV) vaccine.
