LAOAG CITY – Ar-aramiden ti gobierno probinsial ti amin a kabaelan na tapno maurnos dagiti timmaud a problema kabayatan ti panagawat ti aplikasyon dagiti interesado nga agad-adal a manggundaway iti “educational assistance” a napundoan manipud iti pondo a kiniddaw ni Governor Cecilia Araneta Marcos manipod iti Department of Social Welfare and Development.
Daytoy ti inpasigurado ni Atty. Erme Labayog, Provincial Information Officer ti gobierno probinsyal.
Segun kenkuana, nupay awan dagiti nabatad wenno nagpabigbig a nagreklamo ket seryoso ti panangkitkita ti gobierno probinsial kadagiti naipadanon iti facebook.
Kagiddan iti daytoy, nagpadispensar ni Labayog iti kaadda dagiti nakipilpila a saan a nakaawat iti tulong.
Inbatad na a naammoan na manipud kadagiti maseknan a departamento a saan a dagitoy ti nagikkat kadagiti nagnagan ngem dagiti pannakabagi ti Department of Social Welfare and Development.
Kunana nga inlawlawag dagiti maseknan a nagtalinaed ti takder ti Department of Social Welfare and Development a masapul a masurot a naimbag dagiti pagalagadan iti pannakaipaay ti nasao a tulong.
Naammoan nga inpetteng da a masapul a dagiti laeng maipaayan iti tulong ket dagiti awan pay ti naaw-awat da manipod iti gobierno, saan nga iskolar ken maysa laeng iti kada pamilia ti agbalin a benepisiario.
Inpasigurado na kadagiti saan a nakaawat gapu laeng iti kaadda ti kamali iti naisurat a nagan da ken nakaisubmitir iti kopia ti Identification Card da ket mairaman to dagitoy kadagiti sumaruno a benepisiario ti “educational assistance”.
Kabayatanna, inpanamnama ni Labayog a maad-adal dagiti naipadanon a reklamo iti facebook nupay saan a nagpabigbig dagiti maseknan kas paset iti kalikagum ti gobernador a maliklikan ti pannakaulit dagitoy a parikut iti aniaman a programa nga isayangkat ti gobierno probinsyal.
