LAOAG CITY – Inbatad ti House prosecution a saan a direkta a nabigbig dagiti bank witness iti impeachment court no ania dagiti transaksion da Vice President Sara Duterte ken ti asawana a ni Atty. Manases Carpio a na-flag kas suspicious gapu iti bank secrecy ken ti pagannurotan ti anti-money laundering.
Mainaig iti daytoy, nagsubmitir dagiti bangko ken dadduma pay a covered institution ti suspicious transaction report iti Anti-Money Laundering Council (AMLC) ken adda dagiti restriction iti linteg iti panangidatag dagiti report ken dagiti naglaon kadagitoy.
Segun ken ni prosecution counsel ken legal spokesperson Atty. Benjamin “Jay” Tolosa Jr. a limitado pay ti impormasion nga ammo dagiti empleado ti bangko mainaig iti kalikagum ti account holder iti maysa a withdrawal wenno deposito.
Maipalagip nga inusar ti prosekusion dagiti bank record ken report ti Anti-Money Laundering Council (AMLC) kas agsina ngem adda pakainaigganna iti ebidensia iti Article II a mang-akusar iti Bise Presidente ti panagurnong ti unexplained wealth ken paulit-ulit a saan a panangideklerar ti umno dagiti tagikua iti Statements of Assets, Liabilities and Net Worth (SALN).
