LAOAG CITY – Agpada a naiserra idi Hulyo 2026 ti dua a checking account ti Cale88 iti Security Bank, segun ken ni Leslie Cham, Branch Banking Group Head ti bangko, iti maika-35 nga aldaw ti impeachment trial ni Vice President Sara Duterte ita a Miyerkules.
Iti panagsaludsud ni Senator-judge Kiko Pangilinan, kinumpirmaran ni Cham nga adda ti dua a peso checking account ti Cale88 iti Security Bank, ngem agpadan a nakaserra iti agdama.
Basar iti bank records nga indatag ti testigo, ti umuna nga account ket addaan ti ending balance a P332,530.95 idi Disyembre 2025, idinto a ti maikadwa nga account ket addaan ti P21,164.27 nga ending balance iti kapada a panawen.
Sinaludsud pay ni Pangilinan no kaanu a nalukatan dagiti account.
Insungbat met ni Cham a ti umuna nga account ket nalukatan idi Agosto 2024, idinto a ti maikadwa ket nalukatan idi Oktubre 2025.
Nupay kasta, agpada a naiserraa ti dua nga account idi Hulyo 2026.
Ti Cale88 ket maysa a kumpanya a maikonkonektar ken ni Atty. Manases Carpio, ti asawa ni Vice President Sara Duterte ken maipagarop a nakaawat kadagiti remittance manipod iti ruwar ti pagilian.
