LAOAG CITY – Addan ti pakabuklan a 2,339 a kaso ti dengue ti nairekord ditoy probinsia.
Daytoy ket maibasar iti kaudian a datos ti Provincial Epidemiology and Surveillance Unit (PESU), manipud Morbidity Week 1 agingga Week 39.
Manipod iti nasao a bilang ket addan ti tallo a pimmusay gapu iti sakit a dengue ditoy probinsya a dagitoy ket manipod iti ili ti Solsona, Badoc ken Nueva Era.
Gapu iti daytoy, inbalakad ti Provincial Health Unit a masapol nga itultuloy ti panangipatungpal kadagiti usto a wagas tapno malapdan ti ad-adda pay a panagadu dagiti kaso ti dengue ditoy Ilocos Norte.
Karaman ditoy ti panangikkat dagiti pagyanan ti danum a pagitlogan dagiti lamok, taktaken ken dalusan dagiti banag a mabalin a pagurnongan ti danum, siguraduen a namaga ken nadalos ti aglawlaw tapno saan a pagyanan dagiti lamok ken no adda adda sintomas ti dengue kas iti agnanayon a gurigor, nakaro a sakit ti ulo, wenno panagbakwar, mapan a dagus iti kaasitgan nga health facility.
